डा. सुनिलद्वारा बेवारिसे बिरामी बृद्धको उद्धार, नोबेलमा उपचार हुँदै

लोकप्रिय रिपोर्टर / बेवारिसे अवस्थामा भेटिएका बिरामी बृद्धलाई उद्धार गर्न डा.सुनिल शर्मा मोरङको कानेपोखरी पुग्दा ७२ बर्षीय बृद्ध पीडाले छटपटाई रहनुभएको थियो । एक साता अघिदेखि बाँसको टहरो भित्र ओढ्ने ओछ्याउँने बिना नै लेउ लागेको भुईमा वाँसको चित्राको सिरानी लगाएर सुतेका उनको उठ्न सक्ने अवस्था थिएन । सिकिस्त बिरामी भएर थलिएका बृद्धलाई डा.शर्माले उठाएर गाडीमा राख्दै गर्दा ओठ कमाउँदै भन्नुभयो ‘अव त बाच्छु जस्तो छ ।’



बिरामी भई थलिएर सुतेको ठाउँमै दिसा, पिसाव भएको अवस्थामा कानेपोखरी स्थित चिस्याङ खोलाको पुल नजिक भेटिएका उनलाई बिराटनगरको नोबेल शिक्षण अस्पतालका सञ्चालक डा.शर्माले उद्धार गर्नुभएको हो । गम्भीर अवस्थामा रहेका उनलाई आवश्यक सवै कुराको बन्दोबस्ती मिलाएर डा.शर्माले नोबेल अस्पतालमा उपचार गराईरहेका छन् ।
वेवारिसे अवस्थामा भेटिएका बृद्ध सिकिस्त बिरामी भएर उठ्नै नसक्ने अवस्थामा पुगेको थाहा पाएपछि उनको उद्धारका लागि डा.शर्मा कानेपोखरी पुग्नुभएको थियो । धेरै बिपन्न बिरामीलाई निःशुल्क उपचार गरेर ज्यान बचाईसकेका डा.शर्मालाई स्थानीयले बृद्धको अवस्थाका वारेमा बताउँने बित्तिकै उहाँ तत्काल सो स्थानमा पुगेर बृद्धको उद्धार गर्नुभएको हो ।
बेवारिसे अवस्थामा भेटिएका बिरामी बृद्धका आफन्तको अत्तोपत्तो छैन । उहाँ कष्टपूर्ण तरिकाले बोल्नुहुन्छ । तर, बोलेको राम्रोसँग बुझिदैन । उहाँले आफ्नो नाम कृष्णबहादुर राई र घर सुनसरी भएको संकेत गरेका छन् । उहाँ कसरी त्यो ठाउँमा पुगे भन्ने स्थानीयबासीलाई पनि थाहा छैन । ‘बा एकहप्ता अघि यहाँ आएका हुन् ।’ स्थानीय नामा मगरले भन्नुभयो ‘कसले ल्याईदियो कि कसरी आए थाहै छैन ।’
उहाँ एक हप्ता अघिदेखि खानासमेत नखाई प्रयोगबिहिन अवस्थामा रहेको बाँसको टहरोको भुईमा सुतेका थिए । बृद्ध अवस्था र त्यसमाथि सिकिस्त बिरामी परेकाले उनी उठ्नसमेत नसरी एकै ठाउँमा सुतिरहे । उठ्न नसक्दा दिसा, पिसाव पनि सुतेकै ठाउँमा भएर उनलाई झिगाले घेरेको थियो । हाड र छालामात्र भएको जस्तो अत्यन्तै दुब्लो देखिने उहाँ अहिले नोेबेल अस्पतालमा उपचाररत छन् । उहाँको छातिमा समस्या देखिएकाले सोहि बमोजिम उपचार भईरहेको उपचारमा संलग्न बरिष्ट छाति तथा फोक्सो रोग बिशेषज्ञ डा.रामहरी घिमिरेले बताउनुभयो । उहाँका अनुसार उपचारका क्रममा बृद्धको स्वास्थ्यमा सुधार देखिएको छ ।   
बृद्धलाई उपचार र हेरचारका लागि डा.शर्माले सम्पूर्ण बन्दोबस्ती मिलाईदिनुभएको हो । उहाँको उपचारसँगै हेरचारका लागि कर्मचारी खटाईएको छ । बृद्धलाई नुहाईदिएर कपडा फेरिएको छ । खानपिन र औषधिको ब्यवस्था पनि डा.शर्माले नै मिलाईदिएका छन् । बृद्धको स्वास्थ्यमा सुधार भएपछि आफन्त पत्ता लगाएर उनलाई परिवारमा बुझाउँने डा.शर्माले बताउनुभयो । ‘उहाँलाई ठिक नहुँनलेज उपचार गर्छौ ।’ उहाँले भन्नुभयो ‘निको भएपछि आफन्त पत्ता लगाएर बुझाउँछौ ।’

,
Lokpriyasamachar@. Powered by Blogger.