मेलम्ची सुरुङको गेट फ्रेम परिवर्तन गर्न स्थलगत अध्ययन

रुपक पुरी, भदौ ४ ।  

भारतीय कम्पनीका इन्जिनियरहरूले मेलम्ची खानेपानी आयोजनाको सुरुङ प्रवेशद्वार (गेट)को फ्रेम परिवर्तन गर्न स्थलगत अध्ययन सुरु गरेका छन् ।

 पीआईएल कम्पनी अमहदाबादका दुई समूहले मेलम्ची प्रवेशद्वार भत्किएको सुरुङ स्थल अध्ययन गरी पुनः जडान गर्नुपर्ने बताएका छन् ।

खानेपानी मन्त्रालयका प्रवक्ता रितेश शाक्यका अनुसार पीआईएल कम्पनीले मेलम्ची अध्ययन गरेपछि गेटको फ्रेम परिवर्तन गर्न सहमत भएको हो । चारवटा गेटका फ्रेम परिवर्तन गर्नुपर्ने भएको छ ।

ती फ्रेम कम्पनीले भारतमा निर्माण गरिरहेको प्रवक्ता शाक्यले बताउनुभयो । उहाँका अनुसार कम्पनीका सिनियर डिजाइनरहरू आएर मेलम्ची भिजिट गरेर एउटा समूह फर्किसक्यो, भित्रबाट खुल्ने गरी डिजाइन भएको गेट बाहिरबाट खुल्ने गरी जडान गरेपछि दुर्घटना भयो, अब अर्को डिजाइनसहितका फ्रेम आउने छन् ।

फ्रेम छिट्टै ल्याउने गरी काम भएको छ । हाल जडान भएका फ्रेम यथावत नै राखी त्योभन्दा अलिकति भित्री भागमा नयाँ फ्रेम जडान गरिने छ । सुन्दरीजलको गेटको फ्रेम पनि परिवर्तन गरिने छ ।

भित्रबाट खुल्ने गेटहरुको डिजाइनलाई बाहिरबाट खुल्ने गरी जडान गरिएपछि गत असार ३० गते अकस्मात् गेट खुलेर दुर्घटना भएको थियो । पानी पथान्तरणको नियमित परीक्षणका लागि सुरुङमा गएका इ(िन्जनियरसहितको गाडीलाई अकस्मात् गेट खुलेर बगाएको थियो । दुर्घटनामा इन्जिनियर सतिश गोइतको मृत्यु भएको थियो । चालक राधाकृष्ण थापा अझै बेपत्ता हुनुहुन्छ । शेखरचन्द्र खनाल र पेम्बादोर्जे लामा घाइते हुनुभएको थियो । दुर्घटनापछि खानेपानी मन्त्रालयले अध्ययन समिति बनाएर घटनाको अध्ययन समेत गरेको थियो ।